Þetta kemur stjórnvöldum.....

örugglega á óvart. Ég var ekki spurður, en menn vita sjálfsagt hver mín skoðun er.

Meirihluti Íslendinga óánægður með núverandi fiskveiðistjórnunarkerfi

Það hlaut að koma að.....

þessu. Eru menn algjörlega að missa sig? Ég rakst á þessa Frétt á bb.is og var eiginlega orðlaus um stund. Hvernig dettur þessum mönnum í hug að það sé hið sjálfssagðasta mál að loka heilu fjörðunum fyrir einhverja túrista, svo þeir geti notið þess í einhverjum heilögum friði að dorga nokkra titti ? Hvernig væri að þessir ferðamannafrömuðir tækju til í eigin rassgati, og hefðu menn með reynslu og siglingarþekkingu um borð í þessum plastdollum sem þeir leigja ferðamönnum til fiskveiða. Er það ekki sjálfsögð krafa okkar skipstjórnarmanna sem verðum að hafa þar til gerð próf sem gefa okkur rétt til að stjórna skipum og bátum? Einnig þætti mér það sjálfsagt að þessum ferðamálafrömuðum sem bátana leigja, yrðu krafðir um greiðslur fyrir útlögðum kostnaði björgunarsveitanna við leit að þessum ferðamönnum. Er eitthvað eðlileg við það í hvaða farveg þessi vitleysa er komin í?

Líú blaðrar og blaðrar um...

ábyrga umgengni um fiskimiðin. Er ekki löngu orðið tímabært að stjórnarliðar þessa lands hysji upp um sig brækurnar og opni augun fyrir innihaldslausu rugli Líú og banni flottrollsveiðar innan landhelginnar. Hér fyrir neðan er úrdráttur úr tölvupósti sem vinur minn sendi mér, hann er sjómaður á einu af mörgum flottrollsveiðiskipum sem Íslendingar eru svo stoltir af. 

Nú er kappinn staddur á Dohrnbankanum og meiningin að ná í kolmunna. Það liggur við að maður fái
móral þegar belgurinn kemur upp loðinn í átu og smáloðnu. Til dæmis var togað í mökklóði í 4 tíma í
síðasta túr og belgneminn sýndi lóð í belgnum allan tímann en ekkert kom í pokann.
Hvað skyldum við hafa varið að drepa þennan tíma, það er málið það veit enginn og enginn gerir sér
grein fyrir því. Svo er eins og menn fatti ekki að það er verið að skjóta sig í fótinn með þessu
drápi á loðnupöddum sem eru um það bil 4-5 cm.
Þetta skilur maður ekki og sennilega er eins gott að geta ekki skilið alla þessa vitleysu.

Hvernig dettur nokkrum sæmilega hugsandi manni í hug að hlusta á samtök sem svona ganga um fjöregg okkar sem eru fiskimiðin? Það hefur margoft verið bent á að flottrollið er svakalegur skaðvaldur í lífríkinu, en auðvitað er það bara raus og rugl um hluti sem enginn hefur vit á nema Líú. Er það ekki dæmigert fyrir stjórnvöld að þau skuli líta upp til Líú og helst hafa þá með þegar kemur að tillögum og ráðgjöf um bætta umgengni um fiskimiðin?

Ekki vantar flottræfilsháttinn...

í ráðamenn þessa lands. Hvað skyldi það gagnast okkur, þegnum þessa lands að Geir H. Haarde skoði einhverja helvítis frystigeymslur úti í heimi? Væri ekki nær fyrir manngarminn að bregða sér til Vestmannaeyja og kynna sér starfssemi Eimskips á Herjólfi. Það þykir náttúrulega ekki nógu fínt, Það væri nefnilega eitthvað sem gæti komið eyjamönnum til góða.

Forsætisráðherra kynnti sér starfsemi Eimskips í Halifax í Kanada

Íslensk Útrýmingarstefna í...

útrás. Gaman væri að vita hvaða snillingur hélt lofsræðuna um besta fiskveiðistjórnunarkerfi í heimi fyrir Indverja. Hvað skildi það helst vera sem Íslensk stjórnvöld telji sig geta miðlað til Indverja í sjávarútvegsmálum? Við skulum sjá, við nánari hugsun gæti það verið þetta!

Hárnákvæm lýsing á ríkisvörðu þrælahaldi. Vandlega útfærðar áætlanir um að fylgja skuli handónýtum hafrannsóknum. Greinagóðar leiðbeiningar um hvernig skuli gefa auðlindir sjávar nokkrum útvöldum, og hvernig skuli braskað með allt heila klabbið. Einnig hvaða aðferð skilar langbestum árangri við uppbyggingu fiskistofna, sem sagt veiða frá honum allt æti og svelta til hlýðni. Mikilvæg námskeið um hvernig sé best að tala og tala og tala og tala ooooog tala, um akkúrat ekki neitt. Einar K Guðfinnsson gæti haldið fyrirlestur um hvernig bera skuli sig við að ljúga og ljúga og trúa því sjálfur. Ekki þurfum við að hafa áhyggjur af því að það gleymist að stofna einhverja andskotans 
nefnd um herlegheitin, það var náttúrulega byrjað á því. Ef ég mætti ráða myndi ég gefa þeim Hafró og Einar K Guðfinnsson með. Það er eina leiðin til þess að þessi tvö apparöt verði ekki fleirum til skaða, sem sagt hverfa í fjöldann sem enginn tekur eftir. 

  kv. Halli

Íslendingar og Indverjar í samstarf á sviði sjávarútvegs

Viðvarandi truflanir....

um allt land hefði átt að standa þarna. Þetta blessaða Digital Ísland er því miður algjört drasl, myndin frýs í tíma og ótíma síðan er nokkuð algengt að það stendur einfaldlega LOKUÐ RÁS, þótt allar greiðslur séu í góðu lagi. Aldrei hefur þeim dottið til hugar að gefa afslátt þó efnið skili sér hræðilega illa.  Ekki vantar svörin, lélegt loftnet, bilaður myndlykill eða unnið er í lagfæringum á þessu. Hvernig væri fyrir 365 miðla að fá sér aðra tækni og viðgerðarmenn ef þessir sem 
þarna starfa þarna eru svona agalega lélegir að þeir ráða ekkert við þetta. Þetta er nefnilega búið að 
vera svona frá upphafi. Og ef ekki verður breyting á þessu fljótleg skila ég þessu helvítis rusli. Ég er búinn að fá mig fullsaddan af allskonar aukakostnaði og lygaþvælu frá þessu fyrirtæki. Það er margt annað í boði fyrir minni pening og margfalt betri gæði.

Óleyfilegar útsendingar trufla tíðnisvið Digital Ísland

Er nema von...

að karla ræflarnir þurfi að drekka í sig kjark áður en þeir láta skjóta sér út í loftið í þessu drasli. Í það minnsta er engin örugg trygging fyrir því að þeir komist lifandi til baka. Og ef svo slysalega vill til að þeir lifi ævintýrið af, eru þeir hundeltir af geggjuðum kellum. Úff það er ekkert grín að vera geimfari.

  

Reglur settar um áfengisneyslu geimfara NASA

Smávæginlegur misskilningur.

Halda menn virkilega að það sé hægt að ljúga hverju sem er í landann? Hver trúir því að Sláturhús Hellu hafi verið alvara með að fara í samkeppni við sjálfan sig? Þarna var einfaldlega keypt í burtu hugsanleg samkeppni frá öðrum. Og að skíra þetta misskilning, er náttúrulega bara þvæla þessir menn vita nákvæmlega hvað þeir eru að gera.  Hér fyrir neðan er fréttin. Og dæmi hver fyrir sig.

Misskildu útboðsreglurnar
Forsvarsmenn Sláturhúss Hellu töldu sig geta boðið í undirflokka tolla af kjötvörum í núllkvótaútboði í apríl. Þegar annað kom á daginn var hætt við kaup á öllu saman þar sem markaðsaðstæður höfðu breyst. Framkvæmdastjóri segir undarlegt að það hafi engar afleiðingar að fá úthlutað kvóta en sækja hann aldrei.

Viðskipti Misskilningur á útboðsreglum og breytingar á markaðsaðstæðum ollu því að forsvarsmenn Sláturhúss Hellu hf. (SH) sóttu aldrei kvóta sem þeir fengu úthlutað úr núllkvótaútboði á kjötvörum sem haldið var í apríl. Núllkvótinn var liður í samningi við ESB sem ætlað var að stuðla að lækkun matvælaverðs á Íslandi. Hann hefur ekki verið boðinn út að nýju.

SH taldi sig geta boðið í undirflokka tolla af nautakjöti og bauð því lágt verð í hakkvöru, en hátt í dýrara kjöt, til dæmis lundir. Kvótanum var hins vegar ekki úthlutað eftir undirflokkum, heldur einungis yfirflokkum. Eðli málsins samkvæmt var einungis hæstu boðum tekið. Það þýddi að boði SH, sem og öðrum lágum boðum, í hakkvöru var hafnað en hærri boðum í fínna kjöt tekið, þar á meðal boði SH í lundir.

"Við skildum útboðið þannig að það ætti að bjóða í undirflokka," segir Þorgils Torfi Jónsson, framkvæmdastjóri SH. Hann segir að þegar annað hafi komið í ljós hafi SH ákveðið að hætta við allt saman. "Við höfðum ekki kaupendur að því magni að okkur þætti taka því að flytja hitt kjötið inn. Það kom líka aukið framboð inn hjá okkur á þessum tíma."

"Menn flytja almennt inn þá vöru sem vantar á markaðinn," segir Guðmundur B. Helgason, ráðuneytisstjóri í landbúnaðarráðuneytinu. Hann segir það aðallega vera dýrari vöruna og því klárist kvótinn jafnan í dýrari vöruna. "Við höfum brugðist við því með því að hafa bara opinn tollkvóta á föstum lækkuðum gjöldum fyrir nautahakkið til dæmis. Það fyrirkomulag hefur gefist býsna vel."

Auk þessa 550 tonna núllkvóta, það er kvóta sem bjóða má í allt niður í núll krónur, kveður samningurinn við ESB á um almenna lækkun tolla á þessar vörur um fjörutíu prósent. "Það skapar skilyrði fyrir að hægt sé að flytja inn ótakmarkað magn fyrir utan núllkvótann. Það hefur verið talsvert um það," segir Guðmundur.

Við hverju var að.....

búast. Er fólk virkilega svona afmarkað í hausnum að halda það að allir hætti að reykja, þótt bannað sé að stunda íþróttina innan veggja ölduhúsanna? Það gat hver sæmilega hugsandi manneskja sagt sér það að íþróttin yrði stunduð umhverfis húsin. Hvað verður það næsta sem bryddað verður upp á? Blátt bann við því að rekavið, nema vera með skýrteini í rassvasanum upp á að maður sé búinn að kolefnisjafna á sér rassgatið. Fréttin um vitleysuna er Hér .

Hvaða vísindi liggja...............

að baki ákvörðunnar Sjávarútvegsráðherra, um úthlutun aflamarks á næsta fiskveiðiári? Þegar farið er yfir tillögur Hafró og þær svo bornar saman við úthlutun aflamarks kemur eitt og annað skrítið í ljós. Ef Einar K Guðfinnsson er algjörlega handviss um að Hafró hefur rétt fyrir sér um ástand þorsksins, hvernig getur hann þá á sama tíma hunsað margar aðrar tegundir og aukið við þær? Það vita það allir að vonlaust er að veiða svona mikið af öðrum tegundum, með svona fáránlega litlum heimildum í þorski. Hvaða hvati er þar að baki? Er hann að segja að vísindi Hafró séu með öllu ónothæf nema í þorski? Er það nema sjálfsögð krafa að hann útskýri þessa vitleysu fyrir okkur? Þetta er kannski enn einn blekkingarleikurinn sem síðan er reiknaður út hjá Hagfræðistofnun Háskólans stjórnvöldum til stuðnings. Sem síðan stenst engan vegin þegar upp er staðið. Og sannið þið til, það verður einhverjum allt öðrum að kenna heldur en þeim sem vitleysuna sömdu. Hér er Hlekkur  á Kristinn H Gunnarsson sem sýnir það hvernig ráðgjöfin var meðhöndluð.