Togararallið er löngu úrelt fyrirbrigði.

Prófa mætti rússnesku leiðina til að mæla þorskinn

- segir skipstjórinn á Hrafni Sveinbjarnarsyni GK

,,Hegðun þorskins hefur gjörbreyst á tiltölulega skömmum tíma og mælingar fiskifræðinga, eins og togararallið, ná ekki yfir þessar breytingar. Það fæst aldrei heildarmynd af ástandinu nema með því að fara til dæmis rússnesku leiðina, virkja ákveðinn fjölda skipa til óheftra veiða í ákveðinn tíma og sjá hvað út úr því kemur. Þetta gerðu Rússar í Barentshafi og reiknuðu svo út fiskmagnið í sjónum. Togararallið eins og það er útfært er tómur leikaraskapur.”

Þetta segir Hilmar Helgason skipstjóri á frystitogaranum Hrafni Sveinbjarnarsyni GK í viðtali í nýjustu Fiskifréttum. Og hann heldur áfram:

,,Ég tel að niðurskurður þorskkvótans sé alltof mikill og beinlínis til skaða fyrir þorskstofninn því hann leiðir til aukinnar sóknar í smáþorsk nær landi t.d. á ýsuveiðum á línu eins og fram hefur komið. Ég er búinn að vera skipstjóri allan þann tíma sem kvótakerfið hefur verið í gildi. Þorskkvótinn byrjaði í 350.000 tonnum, en síðan var tekið til við að skerða kvótann sem alltaf átti að koma okkur til góða. Ég held að þeir reikni sig á endanum niður í núll. Það vill enginn horfast í augu við hinn raunverulega vanda sem er gengdarlausar veiðar á loðnu og kolmunna. Ég spurði fiskifræðinga að því hvaða áhrif það hefði á grunnkeðjuna í lífríkinu þegar ekki væri lengur til staðar ein milljón tonna af hráefni sem rotnaði á botninum og átti þar við dauða loðnu eftir hrygningu. Þeir gátu ekki svarað því,” segir Hilmar. Heimildir skip.is

Um aðferðarfræði hafró skrifaði ég í Desember og gerði útreikninga á stærð svæðisins sem rannsakað er. Niðurstöðurnar voru svo vægt sé til orða tekið sláandi, um þetta má lesa í hlekkjunum hér fyrir neðan. 

Byrjum hér. 

Um stofnstærðarútreikninga skrifaði ég einnig og setti það út á einfalt mannamál.  

Meira hér. 

Síðan skrifaði ég um aðferðina sem Rússar notuðu og mælti með henni, er gott að vita til þess að menn séu að vakna til lífsins og átta sig á því að Hafró er á algjörum villigötum. Um þetta má svo lesa hér

Góðar stundir. 

 

Athugasemdir

[Grétar Rögnvarsson, 11.2.2008 kl. 16:35]

Halli ég er nú alveg sammál þessu með togararallið, þvílík vinnubrögð, ætla ekki að verja óheftar loðnuveiðar en það er bara eins með loðnuna og þorskinn fræðigarnir vita ekki neitt.

Og þetta með fótboltann, vonandi góð úrslit í kvöld, horfi á leikinn í gær ekki tilþrifa mikill. Les alltaf þetta hressilega blogg frá þér, er latur að kommentera í þessum brælum, haltu áfram, gaman að lesa.

[Jóhann Elíasson, 11.2.2008 kl. 19:21]

Allir sem hafa einhverja smá "glóru" í hausnum, sjá og vita, að togararallið er eitthvað ofan á brauð og á ekkert skylt við fiskifræði og bara "steingervingarnir" á Skúlagötunni myndu láta sér til hugar koma að nota niðurstöður úr því til að meta stærð veiðistofns.

[Hallgrímur Guðmundsson, 12.2.2008 kl. 00:06]

Heill og sæll Grétar, það er margt sem betur mætti fara hjá okkur það er ljóst. Ekki öfunda ég ykkur að hanga þarna austur frá í þessu andskotans tíðarfari sem verið hefur. Nú liggur það fyrir að þínir menn unnu til lukku með það. Þér er alveg fyrirgefið að kommenta ekki við hverja færslu, maður verður að geta hangið við lyklaborðið með sæmilegu móti þegar skrifað er, takk fyrir hólið. Sammála Jói þetta er svo handónýt aðferð að manni svelgist á andadrættinum bara við tilhugsunina.