Fiskmarkaðir: Þorskur hækkar um 16% það sem af er kvótaári

Frétt á skip.is  17.4.2008

  Meðalverð á þorski á fiskmörkuðum hefur hækkað um 16% á fyrstu sjö mánuðum fiskveiðiársins miðað við sama tímabil fiskveiðiárið 2006/2007, samkvæmt samantekt í nýjustu Fiskifréttum. Verðhækkunin dugir þó ekki til að bæta upp þriðjungs niðurskurð á þorskkvóta á fiskveiðiárinu.

 

 Á tímabilinu 1. september 2006 til 31. mars 2007 tóku fiskmarkaðir landsins á móti um 18 þúsund tonnum af þorski, bæði slægt og óslægt, en á sama tíma á yfirstandandi fiskveiðiári voru aðeins seld um 12 þúsund tonn á mörkuðunum. Samdrátturinn nemur rúmum 33%. Heildarverðmæti þorsks fyrir þetta tímabil var um 4,1 milljarður króna 2006/2007 en var komið niður í tæpa 3,2 milljarða 2007/2008. Verðmætin minnkuðu um 22% en meðalverð á kíló hækkaði eins og áður sagði, fór úr um 225 krónum í rúma 261 krónu. Frétt lýkur.

 Nú væri fróðlegt að sjá fiskmarkaðina koma með tölur um stærðarflokka þorsks á sama tímabili. Er verið að selja hlutfallslega stærri fisk núna miða við tímabilið 2006/2007?