Starfsgreinasambandið krefst uppstokkunar aflaheimilda

Á fundi framkvæmdastjórnar Starfsgreinasambands Íslands í gær var samþykkt að óska viðræðna við forsætisráðherra og félagsmálaráðherra vegna þess alvarlega ástands sem er að skapast í fiskvinnslu. Uppsagnir og óvissa mun hafa atgerfisflótta í för með sér, sem skaða mun greinina til lengri tíma.

Framkvæmdastjórnin krefst uppstokkunar á úthlutun aflaheimilda og nýrra samfélagslegra skilyrða og ábyrgðar í því sambandi, áður en það verður endanlega um seinan. Þetta kemur fram á vef Starfsgreinasambandsins

Uppsagnir hjá fiskvinnslu Péturseyjar í Vestmanneyjum

Svona eru fréttirnar frá sjávarútvegnum þessa dagana, og þær eiga eftir að verða margar svona í viðbót. Ætlar ríkisstjórnin ekki að fara að vakna úr Þyrnirósarsvefninum? Hveitibrauðsdögunum er löngu lokið, nú þarf að bregðast við og það þarf að gerast hratt. Byggðunum blæðir og fólkið er farið að fyllast vonleysi, hvað á þetta að ganga langt? Eru vandamálin ekki næg á höfuðborgarsvæðinu þó landsbyggðinni sé ekki bætt við inn í þann pakka?

Athugasemdir

[Hafsteinn Viðar Ásgeirsson, 26.1.2008 kl. 15:38]

Vestmannaeyjar verða náttúrulega sérlega illa úti í þessu öllu hvað vinnsluna varðar. Það grátlega við það er hinsvegar að það er alltaf að aukast þar kvótinn, en vinnslan minnkar eins og annarsstaðar. Það liggur í því að hráefnið er allt flutt utan í gámum og selt erlendum fiskverkendum. Hefur ekkert með kvótasamdrátt að gera, hinsvegar jókst enn þrýstingurinn og áherslan á hráefnisútflutninginn í haust, þegar fellt var út kvótaskerðingin við að senda út óvigtað hráefni. Vitleysunni verður allt að vopni í þessu bulli og allir kenna þeir kvótasamdrætti um...