Svona sé ég hlutina

sun. 9.12.2007

Ísland er best, á Íslandi er minnsta fátækt !!!

Hvernig má það vera að það er ekki hægt að tryggja foreldrahúsi það fjármagn sem það þarf fyrir sinn rekstur? Eru stjórnmálamenn ekki í því þessa dagana að stæra sig af því að á Íslandi sé langbest að búa, fátækt hvergi minni ( að meðaltali ) ríkissjóður rekinn með margmiljarða hagnaði? Hver er svo jólagjöfin í ár? Jú það skal skorið niður í heilbrigðismálum, fjármagn til vegagerðar fært milli ára sem að mínu mati er ein stór blekking og treyst er á að það gleymist eins og margt annað. Sjálfsagt er hægt að nota mörg megabæti á tölvunni í upptalningum af þessu tagi en látum þetta duga.

Hvað kostar það samfélagið ef við hugum ekki að þeim einstaklingum sem farið hafa af þeirri braut sem við flest förum og þarfnast aðstoðar? Er það ekki viðurkennt að það er margfalt dýrara að gera ekki neitt? Er samviska ráðamanna engin? Er þeim alveg sama um þá sem þarfnast aðstoðar inn á rétta braut og sjá tilgang í lífinu aftur? Er þeim alveg sama um þann nagandi ótta og óvissu sem fjölskyldur þessa einstaklinga búa við? Hver vil búa við það að vita ekki hvort barnið sitt sé lifandi þegar hann vaknar að morgni? Hvar svaf barnið mitt, hvar er það? Guð minn góður það var svo mikið frost í nótt. Mig grunar að svona og margar aðrar spurningar renna í gegnum huga þeirra foreldra sem við þetta þurfa að glíma.

Er það ekki skylda samfélagsins að hlúa að þeim sem minna mega sín? Stjórnmálamenn eru okkar fulltrúar, við kjósum þá til þess að fara með þá fjármuni sem við borgum til samfélagsins. Það er þeirra skylda að sinna því sem þeir eru kosnir til. Þeir eru í vinnu hjá okkur, við borgum þeim launin. Skammist til þess að sinna því sem þið eigið að gera, það á enginn að vera á götunni, hvorki heilbrigður einstaklingur eða þeir sem minna mega sín svo sem hópurinn sem ég nefndi hér fyrr í greininni.