Auðvitað á að afskrifa skuldirnar komplett.

Við erum ekki að tala um nema nokkur hundruð milljarða. Það væri náttúrulega algjör hneisa ef skuldir sjávarútvegsins verði ekki afskrifaðar í heil sinni. Hvernig dettur einhverjum heilvita og sæmilega þenkjandi manni það í hug að þessar skuldir verði nokkurn tímann borgaðar?

Hvort við erum að tala um 500 eða 800 milljarða skiptir ekki nokkru máli, það er vonlaust að borga þessar skuldir. Heimsmarkaðsverð á fiski er fallandi og á eftir að falla meira en margan grunar sem aftur gerir skuldarstöðu sjávarútvegsins enn hroðalegri.

Við tökum þetta að sjálfsögðu á okkur í formi aukinna skatta sem er jú alveg eðlilegt enda eigum við ekkert betra skilið. Hverjum munar um að taka svona smotterí á sig í viðbót við öll hin ósköpin sem við þurfum að borga eftir þetta hyski?

Að sjálfsögðu halda handhafar kvótans honum enda væri annað brot á mannréttindum sægreifanna, ekki getum við til þess hugsað hvað þá heldur sofið rólega ef hlutunum yrði háttað á annan veg.

Við megum alls ekki undir neinum kringumstæðum vera vond við sægreifana, þeir eiga mjög bágt þessa dagana enda er það sjálfsagt okkur að kenna líka hvernig komið er fyrir þessu snilldarlega samspili græðgi og skammsýni þeirra sem fengu sameign þjóðarinnar upp í hendurnar og var treyst fyrir henni.

Í stuttu máli þá er það ósköp eðlilegt að þeir sem rændir voru lífsviðurværi sínu borgi svo smá slatta með henni svo vitleysan geti byrjar upp á nýtt frá grunni. Þannig geta allir tekið gleði sína á ný og spilað rúllettuna aftur sallarólegir næstu sex til tíu árin. Þá endurtökum við bara sömu rulluna og dellan heldur áfram.

Það eru mannréttindi sem henta öllum, sumum þó aðeins betur en öðrum en hver er að velta sér upp úr svoleiðis smáatriðum þegar heilsufar sægreifanna er að veði?

Góðar stundir.

Kröfur verði felldar niður að hluta

Athugasemdir

[Höfundur ókunnur, 19.12.2008 kl. 00:15]

Bíddu.... var engin ábyrgð tekin þegar kvittað var upp á þessi lán? Eru útgerðarmenn jafn óábyrgir og bankamenn?

[Stefán Sigurðsson, 19.12.2008 kl. 00:24]

Sæll Hallgrímur,

í skrifum þínum talar þú mikið um sægreifa. Hvenar verða útgerðamenn sægreifar? ertu með eitthvað ákveðið sem þú miðar við eða er þetta huglægt mat? Það væri afar gott að vita þetta, því aðeins þá geta lesendur áttað sig á því hverja er verið að tala um.

Annars var þetta góður pitill.

Stefán Sigurðsson

[Hallgrímur Guðmundsson, 19.12.2008 kl. 07:49]

Þeir virðast vera í sama flokki þessir hópar ókunni höfundur.

Ég nota orðið sægreifi þrisvar í pistlinum Stefán, við skulum nota þetta sem hlutlægt mat svo engum sé mismunað enda stenst það ekki mannréttindasáttmála Sameinuðu Þjóðanna hvað þá heldur stjórnarskrána...

Auðvitað er þetta skrifað sem öfugmæli það sjá allir sem eitthvað hafa fylgst með mínum skrifum um þessi mál. En það sem ég var að tala um í sambandi við fallandi heimsmarkaðsverð á fiski er staðfest hér í þessari frétt. Um þetta hef ég skrifað áður og oftar en einu sinni og hvernig logið var til um hækkandi heimsmarkaðsverði í skjóli fallandi gengis.

Ég er nokkuð samfærður um að einhverjir séu skjálfandi yfir þessari þróun sem verður ekki umflúin og ástæðan er einföld fyrir kröfunni um hækkandi verð á heimsmarkaði. Þetta frábæra samspil græðgis og skammsýni hefur fært mönnum þetta á silfurfati, nú erum við komin að verðlagningu á kvótanum og leiguverði til þeirra kvótalausu. Það er svo aftur efni í heila ritgerð sem má reyndar finna á þessari síðu.

Sorgleg staðreynd sem ekki verður umflúin, ég hef verið kallaður ýmsum nöfnum þegar ég hef talað um þetta en eitt er á hreinu og breytist ekki neitt, ég stend við hvert orð.

Takk fyrir Stefán.