Er Frjálslyndi flokkurinn staðráðinn í því að eyða sjálfum sér?

Á sama tíma og aðrir flokkar svo sem framsókn og sjálfstæðisflokkurinn flýta sínum flokksþingum þá frestar Frjálslyndi flokkurinn sínu þingi fram í apríl.

Ekki veit ég nákvæmlega hvað forustunni gengur til með þessu, halda mætti að menn hræddust þetta þing og frestuðu því vegna væntanlegra mótframboða á forustuna. Ekki get ég með nokkru móti séð það að frestun leysi einhver vandamál sem að flokknum hafa steðjað. Nær væri að halda þingið strax eftir áramót og gera upp þau mál sem helst hafa hrjáð flokkstarfið og brýna helstu baráttumál flokksins.

Ef haldið verður fast við það að þingið fari fram í apríl er ég ansi hræddur um að dánarvottorð flokksins megi gefa út á vordögum. Flokkurinn sem stofnaður var meðal annars til höfuðs kvótakerfinu og betri lífsafkomu fólksins í sjávarbyggðunum hefur svo duglega gleymt uppruna sínum að líkja mætti þessu við svart og hvítt.

Ég fer ekki nánar út í þau mál sem mér finnst farið hafa forgörðum hjá flokknum, en afstaða mín til forustunnar er flestum ljós og ætti fleyrum að vera ljóst að breytingar verður að gera ef flokkurinn ætlar sér ekki að lenda í sögubókum sem misheppnuð tilraun í baráttu fyrir bættum lífskjörum sjávarbyggða Íslands.

Góðar stundir.

Framsókn flýtir flokksþingi og tekur fyrir tillögu um aðildarviðræður við ESB

Athugasemdir

[Ásthildur Cesil Þórðardóttir, 15.11.2008 kl. 23:41]

Á síðasta miðstjórnarfundi var samþykkt að halda landsfundinn í apríl, þegar komið væri gott vegasamband við allt landið.  En það var líka tekið fram að ef svo horfði að það yrðu kosningar í vor, myndi landsfundi flýtt, sem ég vona innilega að verði.

[Árni Gunnarsson, 15.11.2008 kl. 23:49]

Kannski hræðast menn pólitískan dauða eins og annan dauða. Verst er þó þegar aðstandendur fá ekki að ganga á hólm við sjúkdóminn vegna dauðakvíða sjúklingsins. Frjálslyndi flokkurinn hefur tapað öllum sínum trúverðugleika sem stjórnmálaafl fyrir róttækar breytingar.

En líkt og ríkisstjórnin á Íslandi hefur ekki hugmynd um vegna hvers erlendir sjóðir koma ekki með peninga handa henni, skilja forystumenn okkar Frjálslyndra ekki hvernig á því stendur að þjóðin flykkir sér ekki utan um þennan stjórnarandstöðuflokk. Flokk sem vantar ekki nema að tvöfalda fylgi sitt til að koma manni inn á Alþingi samkv. nýjustu könnun!

Við skulum átta okkur á því Hallgrímur að þessi flokkur er núna á sínu þriðja kjörtímabili.

[Hallgrímur Guðmundsson, 16.11.2008 kl. 00:21]

Sæl Ásthildur, gott vegasamband það er haldi sambandi við byggðir landsins allt árið eða fær landsbyggðin ekki nýjar vörur fyrr en í vor? Á meðan flokkurinn mælist ekki sem stjórnmálaafl þá segir sig sjálft að menn verða hvort sem þeim líkar það eða ekki að horfa framan í blákaldann veruleikann og taka til hjá sér.

Ekki trú ég því að veruleikafirran sé svo mikil að menn trúi því að þetta lagist að sjálfum sér. Málunum verður því miður ekki reddað korteri fyrir kosningar það er aðeins of stórt til þess. Þótt sumir haldi það þá er fólk ekki algjör fífl og gleyma öllu strax daginn eftir, ég í það minnsta hef aðeins meiri trú á Íslendingum en það.

Naflaskoðun verður að eiga sér stað og menn verða að koma sér saman um hvert á að halda, eitthvað vantar stórlega upp á það því miður eins og þessi flokkur gæti á glæsta framtíð get ég ekki með nokkru móti séð hvernig það mætti gerast í núverandi ástandi. Forustan er rúin trausti fólksins og það verður að horfast í augu við það. Auðvitað er það sárt að svo sé komið fyrir flokknum en staðreyndirnar tala sínu máli og þær höfum við einfaldlega ekki leyfi til að hunsa.

[Hallgrímur Guðmundsson, 16.11.2008 kl. 00:34]

Sæll Árni, ekki veit ég hvað menn hræðast en veruleikann verður að horfast í augu við annars fer illa það er kristalskýrt.

Hvernig trúverðugleikinn hefur fokið í burtu er ekkert skrítið í sjálfum sér. Nægi að nefna tengsl forustunnar við útgerðir, hver trúir því í alvöru að þegar hlutum er þannig háttað að þeir hjóli í kerfið af hjartans einlægni? Ekki ég það er alveg ljóst. Við þurfum ekki að nefna önnur ágreiningsmál þau þekkja flestir.

[Tryggvi Helgason (IP-tala skráð) 16.11.2008 kl. 01:47]

Sæll Hallgrímur,

Líkt og þú nefnir, þá hélt ég í upphafi, þá er Frjálslyndi Flokkurinn var stofnaður, að höfuð baráttumál flokksins yrði það að losa "kvóta-klafana" af herðum fólksins í útgerðarplássunum og gefa bátasjómönnunum, - aftur til baka, - sitt lögboðna frelsi til fiskiveiða.

En í öll þessi ár hefi ég beðið frétta af þingmönnum flokksins, - að þeir kæmu fram með eitthvað jákvætt á Alþingi, - að þeir bæru fram ákveðin og skír lagafrumvörp til afnáms á kvótakerfinu, - og að þeir jafnframt kæmu fram með lagafrumvarp til nýrra fiskveiðilaga, þar sem Íslendingar endurheimtu sitt "löglega" frelsi til fiskiveiða í sinni eigin íslensku fiskveiði-lögsögu.

En ég sé aldrei neitt í fréttunum um þessi mál, - hefur ekkert gerst, - eftir hverju er beðið ?

[Guðrún María Óskarsdóttir., 16.11.2008 kl. 01:49]

Sæll.

Kjósi menn að mála skrattann á vegginn, þá gera þeir ekki annað á meðan, það hefur löngum verið ljóst, og bæði gömul og ný saga og þar veldur hver á heldur.

Menn þurfa að leysa innbyrðis ágreining annars staðar en á opinberum vettvangi að mínu áliti.

kv.gmaria.

[Hallgrímur Guðmundsson, 16.11.2008 kl. 08:16]

Sæl Guðrún, ég á ekki í neinum innbyrðis ágreiningi við neinn úr flokkum, hinsvegar er mér frjálst að lýsa skoðun minni á hlutunum án þess að til þurfi að koma upphlaup þeirra sem stjórna. Það hefur verið mitt hlutverk að standa á hliðarlínunni og horfa upp á sorglegar aðferðir manna í eigin útrýmingarstefnu án aðstoðar.

Að leysa innbyrðis ágreining annarstaðar en á opinberum vettvangi Guðrún mætti forustuhjörðin hafa að leiðarljósi. Við köstum ekki grjóti í óbreytta flokksmenn þegar þeir lýsa skoðunum sínum á verkum þeirra sem ráða, virkt lýðræði virkar ekki þannig.

Ég vonandi verð aldrei það aumur að ég sitji steinþegjandi á rassgatinu út í horni klappandi fyrir því sem mér finnst ekki vera í lagi og mætti gera betur eins og því miður alltof margir gera.

[Víðir Benediktsson, 16.11.2008 kl. 10:09]

það er kalt í janúar. Allir blankir eftir jólin og margir þunnir eftir áramótin. Svo hugsanlega er best að halda þingið yfir bænadagana þegar allir eru fullir iðrunar og knékrjúpa í auðmýkingu. Menn eru nærgætnari á svoleiðis stundum og þú veist nú allt um nærgætni Halli minn.

[Hallgrímur Guðmundsson, 16.11.2008 kl. 13:24]

Þar er ekkert kaldara í janúar en sá kuldi sem ríkir í stjórnmálunum á Íslandi. Það eru bara þeir huglausu sem þora ekki að horfast í augu við veruleikann.

Höfum eitt á hreinu, Frjálslyndi flokkurinn er á sínu þriðja kjörtímabili og er búinn að þurrka sjálfan sig út horft til skoðanakannana. Ekki bera Jón og Gunna út í bæ ábyrgð á því, þeir sem leitt hafa flokkinn bera á því ábyrgð og enginn annar.

Þeir sem kjósa að láta sem skoðanakannanir séu ónákvæmar og vart takandi mark á nema þegar allt er í plús eru á hættulegri braut. Nærgætni er mér mjög töm Víðir, fáir geta fengið mig til að nálgast viðfangsefnin á annan hátt enda skilar það akkúrat engu nema hroðvirknislegum vinnubrögðum, sárindum og sundrungu.

[Sigurður Þórðarson, 16.11.2008 kl. 17:32]

Það  kann vel að vera að fylgismenn FF eigi erfiðara með að ferðast í þungri færð en almenn gerist og því sé heppilegast að breiða upp fyrir höfuð og bíða af sér versta veðrið?