Haldið á sjóinn með fullan poka af ljósaperum.

Tækninni fleytir stöðug fram og takmörkin er nánast engin. Nú er verðið að gera tilraunir með áhrif ljóssins á hegðun fisks. Er hægt að smala fiskinum með ljósi eins og sauðahjörð inn í rétt, sjá hér?

Nú vitum við það að fiskurinn bregst við náttúrulegri birtu og hegðar sér oft í samræmi við ljósið sem að ofan kemur, en þrátt fyrir það virðist fiskurinn haga sér mun meira í takt við straumskilyrði og velja sér svæði eftir botngerð frekar en einhverju öðru.

Hvað það er nákvæmlega sem hefur áhrif á hegðun fisksins sem veiddur er á grængolandi dýpi þar sem myrkrið er algjört allan sólahringinn er ekki gott að segja en þar virðist straumur, tími og tunglstaða hafa mikið að segja. Á grynnra vatni bregst fiskurinn klárlega við birtu og stórkostulegar breytingar á hegðun hans eftir mismunandi birtu eru oft á tíðum óþolandi ráðgáta og í rauninni ótrúlegt samspil náttúrunnar, sem er eins og margt annað eitt af því sem gerir þetta að þrælspennandi dulheimum.

Það er reyndar nánast vonlaust að lýsa þessum dulheimum og háttarlagi íbúa hafdjúpanna hér í nokkrum orðum, þetta var svona smávægileg útskýring á annars stórbrotnu umhverfi sem við eigum langt í land með að þekkja með einhverri vissu .

En að fréttinni aftur, ef hægt er að smala fiskinum svona saman þá er komin fram ótrúlegt sparnaðar tækifæri í veiðarfærakostnaði. Í stað þess að skrapa botninn með tilheyrandi áhættu á að hengil rífa drusluna, er einfaldlega mokað ljósum á fótreipið eins og höfuðlínuna og trollið látið svífa hljóðlega yfir botninum.

Þetta leiðir svo af sér annan sparnað hjá útgerðinni, ekki þarf að borga aukahluti fyrir netamenn. Netamenn eru sem sagt deyjandi stétt og í stað þeirra koma harðduglegir hálf rafvirkjar þrautþjálfaðir í peruskiptum þegar þær springa með tilheyrandi útleiðsluáhættu.

Í stað þess að vera með netageymslur yfirfullar af glæpsamlega dýrum netastykkjum og trollgarni af öllum heimsins gerðum og sverleika þá er haldið á sjóinn með fullan poka af sparljósaperum...

Góðar stundir.

Athugasemdir

[Svavar Guðnason, 6.11.2008 kl. 23:10]

Getur maður þá ekki fengið pláss sem vanur lengur?

[Hallgrímur Guðmundsson, 6.11.2008 kl. 23:18]

Jú sem hundvanur í peruskiptum.

[Svavar Guðnason, 6.11.2008 kl. 23:28]

Já þetta hefur þann kost að það er hægt að æfa heima

[Hallgrímur Guðmundsson, 6.11.2008 kl. 23:36]

Það er reyndar vel hægt að æfa netabætningar heima í stofu, vankosturinn við það er snarbrjáluð kella yfir öllum afskurðinum. Fyrir hitt fær maður klapp á bakið og góðan bónus á góðum degi sjáðu til.

[Svavar Guðnason, 7.11.2008 kl. 00:28]

Mikið rétt, mikið rétt.