Afneitun í algleymi, lífi eytt með menntahroka.

Friðuð tófa eyðir fuglalífi.

Friðun tófunnar á friðlandinu á Hornströndum hefur gert það að verkum að stærstur hluti lunda- og æðarvarps við Hornbjarg er horfinn. Reglur friðlandsins koma í veg fyrir að menn geti skotið tófuna eins og áður var gert. Reimar Vilmundarson segir hana því hafa fjölgað sér gríðarlega og segist hann aldrei hafa séð jafn mikið af tófu á þessu svæði. Bjarni Pálsson hjá náttúruauðlindarsviði Umhverfisstofnunnar segir engar breytingar í bígerð.

„Jafnvægið sem var hérna var eyðilagt með því að kippa manninum út, nú er svo komið að þarna hefur nær allt lunda- og æðavarp verið eyðilagt,“ segir Reimar Vilmundarson skipstjóri og ábúandi í Bolungarvík á Ströndum. Reimar hefur frá unga aldri sótt egg í Hornbjarg, en nú segir hann erfiðara að ná í egg sökum tófunnar sem sé búin að koma sér fyrir undir bjarginu og hún éti allt sem fyrir er. Hann segir nánast ekkert æðarvarp eftir í Hornbjargi.

„Þetta er allt horfið út af ágangi tófunnar og flestallir ferðamenn og þeir sem koma hingað eru sammála um það, allir nema líffræðingarnir.“

Skýtur tófuna

„Þarna var 600 fugla æðarvarp en nú eru bara nokkrar kollur eftir,“ segir Reimar og bætir því við að í Reykjarfirði sé refurinn skotinn vegna þess að friðlandið nái ekki þangað, en þar segir hann að sé mikið fuglalíf. Reimar segir að þar sem tófan er friðuð þar sé fátt annað að sjá nema tófuna og allt mófuglalíf sé horfið.

Reimar segist sjálfur skjóta alla tófu sem komi á land hans í Bolungarvík, enda sé hann með æðarvarp. Hann segir rétt landeigenda ennþá vera nógu sterkan til þess að menn geti varið auðlindir sínar en Hornbjarg sé ríkiseign og þess vegna megi ekkert gera þar.

Sunnanmenn vita betur

„Það er til spakmæli eftir fróðan mann að vestan sem sagði að lífríkið hér á Ströndum ætti sér þrjá óvini. Númer eitt væru líffræðingarnir, númer tvö væri refurinn og númer þrjú væri minkurinn,“ segir Reimar. Hann segir fólk koma að sunnan í þrjá, fjóra daga til þess að vinna rannsóknarstörf en svo komi heilu doðrantarnir af skýrslum sem enginn fótur sé fyrir. Þegar Reimar er spurður um það hvort hann muni beita sér fyrir breytingum á lögum segir hann:

„Það þýðir ekkert fyrir okkur ómenntaða að leggja orð í belg. Þeirra skoðunum verður ekkert breytt, þeir sitja á sínum skólabekkjum í Reykjavík og vita betur en þeir sem eru hérna allt árið.“

Verður ekki breytt

„Við erum ekkert á leiðinni að breyta þessu neitt á næstunni,“ segir Bjarni Pálsson hjá náttúruauðlindarsviði Umhverfisstofnunnar varðandi málið. Hann segir tófu- og refaveiðar fyrst og fremst vera stundaðar til þess að koma í veg fyrir tjón sem bændur verða fyrir, en það sé ekki tilfellið í þessu máli.

Þegar hann er spurður hvort litið sé á eyðingu æðarvarpsins sem tjón segist hann ekki vera nógu klár á því hversu stórt æðarvarpið á svæðinu sé. Bjarni segir refinn hafa numið land á undan mönnunum og því sé ekki um að ræða ójafnvægi. Engin rannsókn var gerð á fuglalífinu á svæðinu áður en það var gert að friðlandi og þess vegna eiga líffræðingar erfitt með að bera ástandið nú saman við hvernig það var. Frétt á dv.is lýkur.

Þetta hljómar kunnuglega, svona eiginlega alveg eins og Hafró veður um í sínum villum með menntahrokann í algleymi.

Góðar stundir.