Þokuheilarnir á Hafró

Ef vísindasamfélagið á Hafró er ekki lengra komið í sínum fræðum en þetta þá er full ástæða til að efast um hæfni þeirra.

Tilv. í fréttina "

Skynsamlegt væri að loka tilteknum uppeldissvæðum fiskstofna fyrir dragnótaveiðum líkt og gert er fyrir veiðum með botnvörpu af ýmsum ástæðum. Þetta kemur fram í nýútgefinni skýrslu Hafrannsóknarstofnunar.

Stofnunin telur sig þó ekki, að svo komnu, búa yfir þeim gögnum sem nauðsynleg eru fyrir tillögur af þessu tagi.

Markmiðið með útgáfunni var að auðvelda stjórnvöldum að ákvarða hvort dragnótaveiðar væru hugsanlega skaðlegar eða leiddu til brottkasts og veiða á smáfiski umfram aðrar veiðar" Tilv. lýkur.

Hvernig stendur á því að Hafró hefur átölulaust blessað dragnótaveiðar í flest öllum fjörðum og víkum landsins?

Hvernig stóð á því að vísindaakademían á Hafró lagði blessun sína yfir það að dragnótinni yrði hleypt aftur upp í kálgarða fyrir suðurlandi? Er Hafró ekki meðvituð um þau svæði sem opnuð voru fyrir veiðum á þennan hátt?

Svo segist þessi stofnun vera ábyrg og markmiðið er hvað? Jú uppbygging fiskistofna og pottþétt ráðgjöf um skynsamlega nýtingu þeirra. Ég gæti ælt.

Þvílík þvæla, það er til fullt af gögnum um ágæti þess að þessi svæði séu lokuð, einnig lýgur reynslan af þessu ekki, hún er einnig til í sögulegu samhengi. Það eina sem vanta er að vísindaakademían viðurkenni fáfræði sína í þessum efnum. Fiskifræðin er mjög ung og það vantar óravíddir upp á að henni sé hægt að beita með einhverri nákvæmni svo viðunnandi sé. Þar þurfa margir aðrir þættir að spila með sem því miður eru ekki notaðir.

Það hefur margt verið skrifað um þessa stofnun á þessari síðu og því miður hefur síðuritari aldrei séð ástæðu til  að hæla verkum þeirra. Þá kemur ein spurning, er ég svona agalega neikvæður? Svo ég svari þessu sjálfur þá vil ég frekar meina það að topparnir í Hafró hafi handónýta Mó tuggu milli eyrna fremur en heila eins og flestir hafa, fremur en ég sé þjakaður af neikvæðni.

Góðar stundir.

Ráðlegt að takmarka dragnótaveiðar