Það kemur manni ekkert á óvart!

Mokveiddu síld á áður óþekktum veiðislóðum á Breiðafirði

21.11.2007

Síldarbáturinn Áskell EA var í dag kominn á mjög svo óhefðbundnar veiðislóðir. Í morgun fór skipið í Breiðasund, sem er austan við Stykkishólm eða á milli Látralanda og Svefneyja. Sveinn Þórir Ísaksson skipstjóri sagði í samtali við Skessuhorn í dag að hann hefði fyllt bátinn í þremur köstum og fengið 600 tonn eða þann skammt sem hann mátti taka. Sagðist Sveinn ekki vita til þess að síld hefði veiðst á þessum slóðum áður.

Sveinn sagði ennfremur að hann hefði fengið lóðs á miðinn sem hefði leiðbeint sér á veiðislóðina. "Trillukarlinn sem leiðbeindi okkur hingað hafði áður hringt í Hafró og sagt þeim frá miklu magni af síld á þessum slóðum. Þar á bæ hafði honum ekki verið trúað."

Að sögn Sveins er miklu meira magn af síld þarna en í Grundarfirði og þó hefði magnið verið mikið þar.

Sveinn segir í samtali við Skessuhorn að síldin sé mjög góð og lóði mikið á þessum slóðum, eða frá 5 föðmun og niður á botn. Dýpið er um 30 faðmar. “Við tókum litlu loðnunótina með okkur og er hún talsvert minni er síldarnæturnar sem við notuðum í Grundarfirði. En það er vandamál að komast að miðunum vegna skerja, sem leynast þarna. Þau eru ekki merkt inn á kort, en ég fékk óvænta hjálp í morgun og hef ég plottað leiðina inn, svo ég geti gefið öðrum skipum upplýsingar um örugga siglingarleið. Það eru mörg skip á leiðinni hingað, en ætli síldin endi bara ekki inni í Hvammsfirði,” segir Sveinn og hlær, “en þangað fer ég ekki,” bætir hann við. Sveinn segir að aflanum verði dælt yfir í Hákon EA sem vinni síldina um borð hjá sér. Heimildir: http://skip.is/

Ekki bregður mér að heyra það frá þessum trillukarli að honum hafi ekki verið trúað þegar hann í sínu mesta sakleysi bendir Hafró á einfaldar staðreynd. Svona lýsir menntahrokinn sér eins og ég hef oft bent á hér á síðunni minni.

                                                                                                                                                                     

Athugasemdir

[Jóhann Elíasson, 22.11.2007 kl. 16:50]

Ég vil nú ekki skrifa upp á að þarna sé um að ræða hreinan og kláran menntahroka heldur vil ég meina að "heimskan" eigi hér stærri þátt, því það er sama hversu menn læra mikið, "MENN ÞURFA ALLTAF Á LEIÐSÖGN ELDRI OG REYNDARI MANNA AÐ HALDA".  Svo er það undir "greind" manna komið hvort þeir nýta sér reynslu þeirra sem hana hafa.  Það kemur mér ekki á óvart að "spekingarnir" á HAFRÓ, nýti sér ekki reynslu sem er ekki "innanhúss".

[Hafsteinn Viðar Ásgeirsson, 22.11.2007 kl. 21:29]

Hmmmm....þið hafið ekki mikla trú á Hafró-liðinu, frekar en flestir sem hafa eitthvað komið að sjómennsku...

[Hallgrímur Guðmundsson, 22.11.2007 kl. 21:55]

Satt er það Jói það er öllum hollt að hlusta á og meta reynslu sér eldri manna. Hvernig eru aðferðir Hafró? Er það ekki satt að þeir sem eitthvað þorðu að tjá sig voru hraktir frá þessari stofnun? Þarf einhver að vera hissa Hafsteinn að trúverðugleikinn sé löngu fokinn út um kýraugað og ekki get ég séð hvernig menn ætla sér að vinna hann til baka?