Náttsloppur, heimasætan og Evróvisjón

Það er ekki ofsagt að vikan hafi verið erilsöm.

Tíminn hefur bókstaflega þotið áfram, vikan að klárast og vinnutíminn margfaldur á við það sem mörgum þykir alltof mikið.

Hver nennir að spá í svoleiðis aukaatriði ef maður er að gera það sem manni þykir skemmtilegt og gefandi?

Eftir bloggarahittinginn var gengið frá í búðinni fyrir helgina og stefnan tekin þráðbeint heim í hreiðrið.

Já ég segi þráðbeint, enginn aukarúntur út á Dalvík, til Húsavíkur eða Kópasker eftir hráefni eins og stundum hefur verið gert í lok vinnudags...

Náttsloppurinn var rifinn af snaganum og reimaður utan um hálfgerðan horgemling, það má kalla mig það þessa dagana enda gæti hvaða vaxtarræktar helíumblaðra verið stolt af því að losna við á annan tug kílóa á rúmum mánuði...

Sófinn var fáránlega heillandi og með stórsteik að hætti betri helmingsins á diski var stefnan sett á hann og stillt upp fyrir Evróvisjón...

Hver kláraði matinn er mér enn hulin ráðgáta (hef samt hundastóðið grunað) þegar líf færðist í horgemlinginn aftur lá þetta fyrir, Ísland landaði 2. sætinu...

Sannarlega glæsilegt, mitt hlutskipti var að horfa á endursýninguna í sjónvarpinu að keppni lokinni...

Að lokum þá smelli ég með einni mynda af heimasætunni, í þessu hreiðri telst þetta eðlilegt...

Útsofinn og nýr dagur að hefjast, ég finn mér eitthvað að dunda við á meðan restin af fjölskyldunni fær sér næturblund...

Góðar stundir.

Ísland í 2. sæti í Moskvu

Athugasemdir

[Guðrún Emilía Guðnadóttir, 17.5.2009 kl. 09:22]

Enda á heimilislífið að vera svona afslappað. Heyrðu elskan steikin fór örugglega ofan í hundanna, það máttirðu vita og þess vegna að borða áður en maður hallar sér
Huld hefur ekki tekið mynd af þér sofandi á meðan þeir átu matinn, en fæ að heyra um það í dag, og takk fyrir síðast.
Knús Milla

[Hallgrímur Guðmundsson, 17.5.2009 kl. 09:28]

Já svona á þetta að vera það er alveg rétt.

Veiðihundarnir mínir eru ótrúlegir, sakleysið uppmálað þegar ég vaknaði og betluðu meira... 

Takk sömuleiðis Milla, ég er að bíða eftir því að einhver vakni á þessum bæ sjáumst í dag.

[Jóhann Kristjánsson, 17.5.2009 kl. 14:33]

Ertu viss um að hundarnir hafa klárað steikina?  Þeir eru svo mikið sakleysið uppmálað á myndunum að þeir næstum(tek það fram NÆSTUM) sannfæra mig um að svo hafi ekki verið . Atgangurinn er sennilega mikill þegar Huld steikir stórsteikurnar,, Man eftir þegar ég kíkti í heimsókn til þín síðast að atgangur hundanna var mikill.... þó var ekki verið að steikja neitt. Frábær dýr hundarnir :) og gaman af þeim